坊間唔care你點樣發達,但會關心你如何仆街

  • By Kada
  • 2014-06-15
  • Comments Off on 坊間唔care你點樣發達,但會關心你如何仆街

15bl51pz

今日睇蘋果,睇到有遍《全職炒股變病態賭徒》值得分享

周顯早前在其專欄中談及全職炒股的經驗,試過半年內由10萬炒到800萬,亦慘嘗三個月內輸身家變成一無所有,結論是全職炒股的路並不好走。文章在網上熱傳,再一次證明,坊間唔care你點樣發達,但會關心你如何仆街。
 
四個月非人生活實錄
半年前朋友聚會,其中一位讀書最好的,毅然放棄筍工,投入全職炒股。當時很多人覺得佢好威、好型,唔使返工受氣,每日在家對住電腦炒幾個鐘就收錢。半年後睇世界盃再聚會,全職炒家極速「收咧」,半個月前已重返舊舖工作。坊間傳媒,不時報道所謂全職炒股賭神,與朋友傾談半句鐘,得他同意,披露四個月的非人炒股生活。
股場如球場,強如西班牙上半場霸氣十足,下半場被荷蘭打到落水狗,逆轉之快,無人能料,天堂跌落地獄只是眨眼間之事。
足球殘酷,股場更加殘酷,朋友選擇全職炒股,緣於去年贏得太順,「買銀娛、買騰訊,睇完圖食了幾轉,等股價回番又入過,細價股又扑中幾隻,唔夠半年就賺了三、四年人工……時間真係唔夠用,當時諗如果全心炒股睇technical,會賺得更多,且有四年人工做本,有本錢可守。」
 
新年後,朋友開始全職炒股生涯,「開市前睇報紙通告做功課,九點半開始落盤,四點收市後,畫圖睇年報做分析,頭一個月科網仲有得炒,每日trade十幾宗,當時覺得非常充實。雖然覺得(科網)有泡,但圖表仲好靚,已經mark咗位,跌穿就走。」
順境波人人識踢,覺得賺到錢是我本事。3月份後,所謂新經濟股開始散水,朋友要踢逆境波,「頭幾日輸錢,我還覺得是短暫調整,但持續一、兩個月,生活變得渾渾噩噩,每日的任務是meet target、追quota,定了每月賺到原本份糧,今月做唔到,下個月壓力更大,只有攻冇得守,你的底線就是冇底線。」
 
遇上逆境即陣腳大亂
「昔日肯長揸,因為有份糧去守,現在卻變成飢不擇食,幾格都唔放過。變得太過計算,每日為trade而trade,明明冇心水,但見到隻股仔成交大異動,又不知不覺地買入,好似病態賭徒咁,輸part都輸死,唔夠一季輸了去年大部份利潤。技術分析完全失去效用,跌穿止蝕位打靶,就見底反彈,有種感覺就係連個天都唔鍾意我。」
聽佢講到這裏,突然想起昔日前輩的一番話。「你覺得全世界得你識睇圖咩?大戶唔識技術走勢,但會請幾個圖表專家睇,個個都識畫條支持線,set咗跌穿$5止蝕,我係大戶,就要隊落$4.7、$4.8,等你班聰明仔乖乖地打靶,然後買番上嚟激死你。」朋友聽完,覺得有幾分道理。 
 
揀股最叻的基金經理、分析最獨到的分析師、所有冧巴都識的財演,全部都非全職炒股,要靠別人的錢搵錢,或者收取高薪厚職。誠如曾教授話齋,只有兩種人可以全職炒股,那就是莊家與莊家的好朋友。
 
股榮
http://www.facebook.com/stockwing1

Tags: ,

Comments are closed.